باٿ شھر (Bath city) انگلينڊ (England) جي ڏکڻ الهندي ۾ آھي ۽ لنڊن شھر کان 185 ڪلوميٽر اولھ جي طرف آھي، ان شھر کي تاريخي حيثيت حاصل آهي. 1987ع ۾ رومن زماني جي ٺھيل حمامن ڪري ھن شھر کي تاريخي ورثو قرار ڏنو ويو. اھي حمام قدرتي گرم پاڻي جي چشمن تي ٺاھيا ويا ھئا. شھر سمرسيٽ ڪاؤنٽي منجھ آھي. شهر جي ڀرپاسي ۽ چوطرف سهڻا نظارا، واديون، ٽڪريون ۽ وڻ جھجھا آھن. شھر جي چوڌاري دريا ايوان (Avon) وھي ٿو. جتي ماڻھو ننڍڙيون ٻيڙيون ھلائن پيا. ارڙھين صدي جي اڏاوت ۽ جديد نموني جي رھائش جي ڳانڍاپي شھر کي ويتر سھڻو ڪري ڇڏيو آھي. جڳھ جڳھ گلن جون ٽوڪريون ٽنگيل آهن. عجائب گھر، اوائلي زماني جا چرچ، گھٽيون، سياحن ۾ شوق وڌائين ٿا. شھر جي ڪمائي سياحن، پرنٽنگ انڊسٽري ۽ آئي ٽي انڊسٽريز منجھان ٿئي ٿي.